በስመ አብ ወወልድ ወመንፈስ ቅዱስ አሐዱ አምላክ፡፡

“ወባረኮሙ ኢያሱ ወፈነዎሙ – ኢያሱም መረቃቸው፣ ሰደዳቸውም፤”(ኢያሱ ፳፪፡፮)

ክቡራንና ክቡራት የ2015 ዓ/ም የከፍተኛ ትምህርት ተቋማት ግቢ ጉባኤ ምሩቃን

ከሁሉ አስቀድመን አምላከ ቅዱሳን፣ መፍቀሬ ሊቃውንት፣ ሊቀ ካህናት ጌታችን አምላካችንና መድኀኒታችን ኢየሱስ ክርስቶስ ሁላችሁም የሚጠበቅባችሁን ትምህርታችሁን አጠናቃችሁ ለዛሬው ድርብ የምረቃ በዓል ስላደረሳችሁ ክብር ይግባውና እንኳን ደስ አላችሁ እንላለን፡፡

ምሁራነ ኦሪት ከመጻሕፈተ ኦሪት ውስጥ የታሪክ መጻሕፍት የሆኑትን በልዩ ልዩ መልኩ ያጠኗቸዋል፡፡ በዚህም ከመጽሐፈ ኢያሱ ወልደ ነዌ እስከ 2ኛ ነገሥት ያሉትን መጻሕፍት “መጻሕፍተ ታሪክ ዘቀደምት ነቢያት” በማለት ይጠሯቸው ነበር። ሊቃውንቱ እነዚህን መጻሕፍት የታሪክ መዛግብት ብቻ አድርገው ሳይቆጥሩ፥ የቀደምት ነቢያትን ትምህርትና ምሳሌ የያዙ በመሆናቸው ከኦሪተ ሙሴ ሳይለዩ ያስተምሩባቸዋል፡፡ ለመጻሕፍቱ የሚሰጡት ክብር ትውልዱ ከይዘታቸው እንዲማርና በጥንቃቄ እንዲራመድ ያደርጉታል፡፡ ጠቢቡ ሰሎሞን ልጄ ሆይ በራስህ አስተያየት ጠቢብ አትሁን ይላልና (ምሳሌ 3፡7)፤ ሕዝበ እግዚአብሔር በልብ ወለድ ሐሳብ እንዳይነዳ ለመጻሕፍቱ መልእክት ተገቢውን ትኩረት እንዲሰጥ ያስተምራሉ፡፡ የእምነትም ይሁን የቀኖና፣ የታሪክም ይሁን የሕግ፣ መጻሕፍት ዓላማ ትውልድ የመጻሕፍትን መልእክት ባለማወቁ ምክንያት እንዳይፈረድበት፣ ጥፋት እንዳያገኝው በማስረጃ ለመምከር ነው፡፡ ከላይ የተጠቀሰው የመስፍን ኢያሱ መጽሐፍም ከሚያስተላልፈው መልእክት ውስጥ አንዱ በጠላቶች ላይ ድል የሚያገኘው በእግዚአብሔር ኃይልና ጥበብ ብቻ መሆኑን በጥብቅ ያስገነዝባል። የእግዚአብሔር ሕዝብ በአምላካቸው ላይ በፍጹም እምነት በሚደገፉበት ጊዜ አሸናፊ እንደሚሆኑ እርሱን ሲታዘዙ ድል አድራጊነታቸው እንደሚጨምር የመታዘዝን እና የእምነትን ኃይል በሚገባ ያስተምራል፡፡

መስፍን ኢያሱ የተስፋ ምድር የሆነቸውን ከነዓንን ለሕዝበ እስራኤል ካካፈላቸው በኋላ ሁሉም በየተመደቡበት ተጓዙ፤ በማኅበራዊም ሆነ በሥርዓተ አምልኮ ጊዜ ሊፈጽሙት የሚገባቸውን ሁሉ አደረጉ፤ በመካከል የነበረውንም ልዩነት በፍትሕ፣ በምክክር እና በስምምነት ጨረሱ ከዚያ በኋላ ኢያሱ የሮቤልን ልጆችና የጋድን ልጆች የምናሴንም ነገድ እኩሌታ ጠርቶ “የእግዚአብሔር ባለሟል ሊቀ ነቢያት ሙሴ ያዘዛችሁን ሁሉ ጠብቃችኋል፣ እኔም ላዘዝኋችሁ ነገር ሁሉ ታዝዛችኋል፤ እስከ ዛሬ ድረስ ወንድሞቻችሁን አልተዋችሁም፣ የአምላካችሁንም የእግዚአብሔርን ትእዛዝ ጠብቃችኋል። አሁን እንግዲህ ተመለሱ፣ ወደ ቤታችሁና የእግዚአብሔር አገልጋይ ሙሴ በዮርዳኖስ ማዶ ወደ ሰጣችሁ ወደ ርስታችሁ ምድር ሂዱ። የእግዚአብሔር ባሪያ ሙሴ ያዘዛችሁን ትእዛዙንና ሕጉን ታደርጉ ዘንድ፣ አምላካችሁን እግዚአብሔርን ትወዱ ዘንድ፣ መንገዱንም ሁሉ ትሄዱ ዘንድ፣ ትእዛዙንም ትጠብቁ ዘንድ፥ ከእርሱም ጋር ትጠጉ ዘንድ፣ በፍጹምም ልባችሁ በፍጹምም ነፍሳችሁ ታመልኩ ዘንድ እጅግ ተጠንቀቁ ብሎ መረቃቸው፣ ሰደዳቸውም፡፡ እነሱም በሰላም ወደ ቤታቸው ሄዱ።”

የተከበራችሁ በዓለማዊው ዕውቀት የላቃችሁ መንፈሳዊ ትምህርት የቀሰማችሁ የግቢ ጉባኤ ምሩቃን

እንደሚታወቀው የተጻፈው ሁሉ ለእኛ ምክር፣ ተግሣጽና ትምህርት እንዲሆን የተጻፈ ነው፡፡ ኢያሱ ሕዝብን እንዲመራ፣ ወደ ተስፋው ምድር እንዲያስገባ የተመረጠ፣ የመላውን ሕዝብ ደኅንነት ጠብቆ፣ ከነገድ ነገድ ሳያዳላ፣ ከእውነተኛ መሪ በሚጠበቅ መልኩ ሁሉንም በአንድነት መርቶ ከነዓን አስገባ፤ ርስትንም አካፈለ፣ ከዚያም አስደናቂ የሆነ ምርቃትን አስተላለፈ፣ የኢያሱ ምርቃት ቡራኬን ከምዕዳን ጋር ያስተባበረ ሰማያዊ ጸጋን የሚያሰጥ ምድራዊ ሕይወትን የሚያስተካክል መመሪያ ነው፡፡

በመጀመሪያ ለምርቃት የበቃው ሕዝብ ከኢያሱ በፊት የነበሩ የአባቶቹን ትእዛዝ የጠበቀ ትውልድ መሆኑንን “የእግዚአብሔር ታማኝ አገልጋይ ሊቀ ነቢያት ሙሴ ያዘዛችሁን ሁሉ ጠብቃችኋል” በማለት አረጋገጠ፣ በመቀጠልም “እኔም ላዘዝኋችሁ ነገር ሁሉ ታዝዛችኋል” በማለት በዘመኑ ለተሠየመው ፍትሐዊና ብልህ፣ አድሎ የሌለው ለሁሉም እኩል የሚያገለግል፣ ለሕዘቡ ደኅንነት ራሱን አሳልፎ ለሚሰጠው መሪያቸው መታዘዛቸውን አሳወቀ፡፡ በሦስተኛ ደረጃ በነገድ በቤተሰብ ሳይለዩ ወገኖቻቸውን መርዳታቸውን “ወንድሞቻችሁን አልተዋችሁም” ብሎ ፍቅረ ቢጽ ያላቸው መሆኑን መሰከረ፤ በመጨረሻ በዐራተኛ ደረጃ “የአምላካችሁንም የእግዚአብሔርን ትእዛዝ ጠብቃችኋል” ብሎ። ለፈጣሪ ሕግ መገዛታቸውን አረጋገጠላቸው፡፡ ከዚያ በኋላ ባረካቸው፣ መረቃቸው፣ ያለነቀፌታና ያለፍርሃት በሰላም አሰናበታቸው፡፡ ከመረቃቸው እና ከባረካቸው በኋላም ከላይ የተጠቀሱትን ዐራት ትእዛዝት ማለትም ሕገ አበውን፣ ሕገ ዘመንን፣ ፍቅረ ቢጽን፣ ፍቅረ እግዚአብሔርን ጠብቁ ብሎ አዘዛቸው፡፡ ይህን ያደረገበት ምክንያት ምርቃቱና ቡራኬው የሚጸናው ለቡራኬ ምክንያት የሆነንን መሥፈርት ጠብቀን ስንገኝ መሆኑን በጥብቅ ለማስገንዘብ፣ እስከ መመረቅ ያደረሰንን ዕሴት ከምረቃ በኋላም መጠበቅ እንዳለብን ለማሳሰብ ነው፡፡

ለመመረቅ ከተጋን ዘንድ የተመረቅንበትን ምክንያት ለመጠበቅ የበለጠ መትጋት ይገባል፤ ለመመረቅ የጓጓነውን ያህል በተመረቅንበት ጠንክረን ለመሥራት መትጋትን ልንጓጓ ይገባል፡፡ አለበለዚያ ምርቃቱና ቡራኬው እስከ ምረቃው ቀን ድረስ ብቻ ይሆነናል፡፡

ቡሩካንና ቡሩካት የመንፈስ ቅዱስ ልጆቻችን፣ የቤተ ክርስቲያናችን የቁርጥ ቀን ባለሟሎች!

ነቢይ ኢያሱ ተናገራቸው ዐራት ትእዛዛት ዛሬም የምረቃ መስፈርት ናቸው፤ አሁንም አሉ፣ እነርሱም አንደኛ የአባቶቻችንን ትውፊት እና ባህለ አእምሮ፣ ዕቅበተ እምነት፣ መጠበቅ ዋናው ነው፤ ሁለተኛው በዘመናችን ያለው ትውልድ የደረሰበትን ደረጃ አልፈን ጥያቄውን መልሰን፣ የአጽራረ ቤተ ክርስቲያንን ጥቃት አክሽፈን የሃይማኖት ርስትን የመጠበቅ ግዴታ ነው፤ ሦስተኛው በዘመን አመጣሽ የክፍፍል ሤራ ሳንሸነፍ፣ ሁላችንም በክርስቲያናዊ ቤተሰብ አንድ መሆናችንን በማመን እና በተግባር በመግለጽ ለወገኖቻችን ያለንን ቀና አገልግሎት መግለጽ፣ መደጋገፍ እና መተባባርን ይመለከታል፤ በመጨረሻም በዘመን የማይለወጠው ፍቅረ እግዚአብሔር እና ፍቅረ ሃይማኖት ናቸው፡፡

ቡሩካንና ቡሩካት!

እናንተን ከሌሎች ምሩቃን ሁሉ ልዩ የሚያደርጋቸሁ ድርብ ተመራቂ መሆናችሁ ነው፤ በዩኒቨርስቲ ቆይታችሁ በርካታ ሙያዎችን በጽንሰ ሐሳብ እና በቤተ ሙከራ ተምራችሁ በየሙያችሁ ተመርቃችኋል፣ በተጨማሪም ባላችሁ ትርፍ ጊዜ ዋዛ ፈዛዛን ሳትከተሉ፤ በቤተ ክርስቲያን ጥላ ሥር ቁጭ ብላችሁ የተዘጋጀላችሁን መንፈሳዊ ትምህርት ቀስማችሁ ሁለተኛውን ምረቃ ደግሞ ከእግዚአብሔር ቤት ተመረቃችሁ፡፡

እንግዲህ እናንተ ብዙ ተሰጥቷችኋል እና ብዙ ይጠበቅባችኋል፤ የእኛ ዘመን ትውልድ ብዙ ችግር አለበት ካልን ብዙ መፍትሔ ያስፈልገዋል ማለት ነው፡፡ ለዚህ ደግሞ እንደእናንተ ያሉ በሁለት ወገን የተመረቁ ወጣቶች ያስፈልጉናል፡፡ ስለዚህ በተማራችሁ ትምህርት እና በሰለጠናችሁበት ሙያ ሀገራችሁን፣ ቅድስት እናት ቤተ ክርስቲያናችሁን እና ሕዝባችሁን በትጋት እና በቅንነት እንድታገለግሉ፣ ለችግሩ መፍትሔ፣ ለድካሙ ጥንካሬ እንድትሆኑ አደራ በማለት ሁላችሁንም የዛሬ ምሩቃን እንኳን ደስ አላችሁ፣ እግዚአብሔር አምላካችን የሥራና የአገልግሎት ዘመናችሁንና ሕይወታችሁን በሙሉ ይባርክላችሁ ይቀድሳችሁ እላለሁ፡፡

እግዚአብሔር አምላካችን

ለሀገራችን ኢትዮጵያና ለዓለም ሁሉ ሰላምን ይስጥ!

አባ አብርሃም

የኢ/ኦ/ተ/ቤ/ክ/ መንበረ ፓትርያርክ

ጠቅላይ ቤተ ክህነት ጽ/ቤት ዋና ሥራ አስኪያጅና

የባሕር ዳር ሀገረ ስብከት ሊቀ ጳጳስ

ሰኔ 2015 ዓ/ም አዲስ አበባ